- 160 -

1349. Juli 21. Liegnitz.

Herzog Wenzel schenkt dem Kloster der Benediktinerinnen zu Liegnitz acht grosse, deutsche Hufen in seinem Walde am Schwarzwasser zu beliebiger Benutzung, auch sollen sie auf den herzoglichen Seen zu Kunitz, Coskewicz und Jacobsdorf je einen Fischer halten können.

In nomine domini amen. Nos Wenceslaus primus dei gracia dux Slezie dominus Ligniczensis notum firi (!) volumus vniuersis et singulis presencium noticiam habituris, quod diuina inspirante clemencia volentes transitoria pro eternis et terrena pro celestibus commutare ob reuerenciam corporis Christi et remedium ac salutem animarum nostri et nostrorum progenitorum in bona mentis et corporis valitudine non seducti nec per errorem sed ex certa sciencia fundauimus, dotauimus et ereximus monasterium sanctimonialium ordinis sancti Benedicti prope ciuitatem nostram Lignicz in honore corporis Christi, sancte Hedwigis et sancte Katherine dedicatum, cui siquidem monasterio pro fundo et dote ipsius primaria ac pro eius fabrica de nostre liberalitatis munificencia dedimus et perpetue donauimus octo mansos magnos et Theutonicos in silua et merica nostra Ligniczensi, quos bone memorie quondam fidelis noster Jesko Buzewoy miles ad sue vite tempora dinoscitur habuisse, secundum quod iidem octo mansi in omnibus suis metis, limitibus et gadibus limitati sunt circumferencialiter et distincti, qui videlicet octo mansi incipiunt ab inferiori via, qua rustici in Arnoldisdorf suis pergunt curribus, quando peruenitur trans nigram aquam que wlgariter dy Borow nunccupatur, adjacentes contigue eidem aque et hiis duobus mansis, quos predictvs dominus Jesko prius dinoscitur habuisse, et cum longitudine sua ascendendo conterminantur metis et greniciis illorum de Beroldisdorf se protendentes ad uadum, qui wlgariter Wittchinvort dicitur et transcendentes cum sua latitudine superiori se pretendunt vsque ad uallem, qui wlgaritur der vordirste schossgrunt appellatur, cui etenim monasterio nec non sanctimonialibus ipsum inhabitantibus, que sunt et pro tempore fuerint, prefatos octo mansos liberos et exemptos ab omni seruitutis grauamine et ab omnibus angariis damus, appropriamus et ascribimus cum pleno iure et dominio et tum cum ecclesiastica libertate perpetuis temporibus possidendos et in vsus earum vtiles et necessarios convertendos ita quod procuratores sanctimonialium earundem dictos octo mansos possint extirpare pro agricultura vel pratis aut piscaturas ibidem facere prout hoc ipsis vtilius et conueniencius videbitur expedire, addicientes de nostri principatus munificencia speciali de nostris lacubus et piscaturis aquarum omnium in Cunicz, Coskewicz et Jacobisdorf in quolibet lacu unum liberum piscatorem temporibus perpetuis ipsis monialibus pro ipsarum nutrimento ad piscandum omni impedimento a nobis et nostris officialibus postergato. Cum igitur omnia hic premissa de nostra mera et libera voluntate dedicata sunt ad monasterium prenotatum nec ammodo sunt in vsus aliorum hominum secularium conuertenda, et ne aliquis nostrorum successorum ausu temerario presumat premissa aliqualiter violare, presentes literas desuper conscribi volumus et nostri sigilli munimine roborari. Datum et actum in Legnicz anno domini millesimo tricentesimo quadragesimo nono, feria tercia proxima ante diem Jacobi apostoli, presentibus domino Heynrico de Landiscron, domino Franczconi (!) Buzewoy, Gawino Abscacz, Peczkoni (!) Schirmer, Gotboldo de Waldow, Franczkone aduocato Ligniczensi et domino Nycolao de Ruffa ecclesia canonico Legniczensi nostro prothonotario.

Orig. Prov. Arch. Liegn. Bened. No. 8. An grüner und rother Schnur das gewöhnliche Siegel.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866